本文重點
花旗香港與中文大學合作嘅金融實務課程又開學喇，尋日絲絲去咗開學禮，見到今年嘅同學人數比去年又多咗，今年錄取咗60名學生，花旗香港行政總裁及總經理盧韋柏（Weber）話，希望未來舉辦嘅課程可吸納愈來愈多學生，幫吓佢哋手。
夥中大合辦受歡迎
花旗呢個課程一直係中大學生嘅搶手貨，每年都要經過篩選先可以得到入讀資格，表現標青嘅學生仲可以到花旗實習，就連中大副校長許敬文都講笑話，花旗舉辦嘅課程比佢教嘅課程受歡迎好多，仲話自己嘅課程同金融都好有關係，乘機向花旗金融實務課程嘅同學仔宣傳吓。
花旗搞課程咁成功，Weber都話希望遲啲可以一次收夠100個學生。佢勉勵同學仔時話金融海嘯過去，希望第日同學成為佢哋嘅一分子，一齊重建人們對金融機構嘅信任，亦認為同學仔同樣可為佢哋帶嚟新思維及啟發。睇嚟啲同學仔亦無令Weber失望，因為Weber話前屆嘅同學仔問題多多，有同事話要面對同學發問連老闆都唔會問嘅問題，認真互動性十足。
余絲韻