本文重點
「龐氏騙案」主角馬多夫早已入獄，不過佢咁多年騙到嘅身家就繼續曝光，美國當局將喺馬多夫兩公婆屋企搜出嘅200物件進行拍賣，拍賣所得會償還畀騙案苦主。
究竟有乜嘢賣？好似勞力士錶、名貴頸鏈、外套及皮草、手袋都係主打，細件嘢仲包括名牌卡片座等，淨係批「勞」估值都過50萬美元。
有興趣嘅話，可以喺本周六舉行嘅拍賣會舉吓手，絲絲估計馬多夫私人珍藏嘅16隻勞力士，當中外號「監犯錶」嘅古董勞，估值達8.75萬美元。
平貴用品包羅萬有
個拍賣會唔係只有貴價嘢賣，仲有啲普通家庭都用得着嘅物品，好似適合平民百姓購買，底價只係20美元嘅馬多夫住宅門牌，亦有底價90美元嘅釣魚用具。假如苦主要向馬多夫發洩，亦可考慮底價90美元、附有馬多夫及佢老婆個名嘅信紙及辦公室用品。
收納馬多夫物件嘅美國司法秘書部，亦不忘好幽默咁喺拍賣單張上表明，所有拍賣物件描述均相信係「真確」嘅，但當局唔會對當中嘅準確性包括質量、價值等承擔責任！
余絲韻