本文重點
雖然香港係一個華洋共處嘅地方，不過如果大家都係中國人，講嘢相處始終同聲同氣啲！英國保誠香港之前多數係由外國人「打骰」，最近公司易帥，由喺香港保險業打滾咗25年嘅容佳明出任CEO，成班員工見到新老闆係名副其實嘅「自己人」，都話覺得非常親切！
Derek（容之洋名）一上場就已經同成班員工有好多溝通機會，因為佢認為作為領袖，溝通係其中一樣非常重要嘅元素。
華人掌帥 員工好溝通
咁又係，大家互相了解對方心意，摸清喜好，以後辦事都順利啲！Derek話有信心今年生意可錄得正增長，明年仲要做到有雙位數增幅！
正所謂同行如敵國，Derek之前領導美國友邦，生意都做得唔錯，所以英國保誠嘅員工都向Derek請教，有乜嘢良方可以打低對手。Derek話最緊要係做好自己，其他控制唔到嘅嘢就由得佢。
眾所周知，Derek係超級足球迷，一得閒就去踢波，咁啱佢明年五月就會帶隊，同一班表現突出嘅經紀同遊西班牙巴塞隆拿，話唔定撞啱有賽事，仲可以現場欣賞勁旅嘅表現。講起足球，親身睇過兩屆世界盃嘅Derek話，明年南非世界盃佢都心郁郁想去，不過又有啲怕危險喎！
余絲韻