本文重點
商業機構經常舉行學生活動，鼓勵多啲同學仔加入商界做生力軍。花旗集團每年都舉行嘅「國際案例分析比賽」，今年共有21隊參加破晒紀錄，並由澳洲墨爾本大學奪魁。
今年同學仔要提出創新方案，以解決八達通面對嘅策略性及管理難題。近年八達通除咗用嚟買嘢畀錢外，仲成為去唔同地方嘅認證卡，絲絲落會所就用得着，但係返母校行行企企就要換卡，方便極有限。
獻計擴大八達通認證
今次墨爾本大學提出嘅策略，就係將八達通嘅認證功能擴大，大幅增加可用嚟認證嘅地方，做到一卡在手，四處通行。
墨爾本大學嘅同學仲建議將個人醫療紀錄都記埋入八達通，咁就唔使因為某醫生有病歷紀錄，次次都要睇同一個醫生。絲絲成日搬屋，如果八達通有呢個功能就功德無量。
今次參加嘅同學每人都獲一張內含100蚊儲值額嘅八達通，可以搭車、搭船遊吓香港，花旗香港區行長章晟曼都話同學參加比賽之餘，仲可以感受吓香港活力。
余絲韻