本文重點
不時都會聽人講，幫有錢人計身家無乜意思，因為只係數字遊戲，對佢哋嚟講，富貴可能真係有如浮雲。《福布斯》雜誌近日除咗按例公布新一年嘅《美國超級富豪榜》外，仲特登將一班富豪嘅財富形象化，等大家可以較易想像到佢哋究竟幾有錢。
蓋茨可買起哥斯達黎加
大家要注意，雖然話一班美國富豪嘅身家因為金融海嘯而縮咗水，但佢哋仍然係富可敵國，並唔係話等於幾多個法國城堡或幾多架私人飛機咁小兒科。好似首富蓋茨咁，據《福布斯》計算，佢500幾億美元嘅身家，就經已超過140個國家嘅GDP，亦可以買起成個哥斯達黎加。
至於排第二位嘅「股神」巴菲特，雖然身家縮水到只有400億美元，但已經差唔多可買到成個北韓；至於金融市場「狙擊手」索羅斯坐擁嘅130億美元，就足以買下去年因金融海嘯而破產嘅冰島。就連電影《星球大戰》系列大導演佐治魯卡斯嘅30億美元身家，都可以買下南美洲國家圭亞那。近日內地大型發展商恒大地產（03333）上市，即令到主席許家印進身中國富豪嘅前列，唔知《福布斯》稍後會唔會以另類方式去幫一班中國富豪計吓身家？
余絲韻