本文重點
忙中有錯成日有，尋日創業板嘅東大新材料（08229），竟然唔小心上載咗份草稿上港交所，當係正式公告，仲要成個半鐘頭之後至發現「補飛」，上載番個正式版本，真係笑爆絲絲個嘴。不過絲絲又好慶幸自己唔係做呢樣工作，否則以我粗心大意嘅性格，唔小心上載咗自己張相睇照上去都唔知點算。
改舊版本點知出事
東大新材料原本想出盈警，其實佢哋八月嗰陣都出過一次，今次又要出，梗係慳番啲時間唔會重新打個另一份啦，所以就諗住用個舊版，改吓日期時間就搞掂，於是就用筆喺原本嗰份做記號，諗住再改晒啲日期，點知就咁出事，唔知點解會上載咗份草稿！
港交所發言人就話唔會評論個別公司嘅情況，不過上市公司要對披露負責任，符合上市規則同埋完備先可以發布。不過絲絲就覺得呢個做法好有創意，除咗公布今次嘅訊息之外，仲提醒大家佢之前出過盈警，而且用手寫更加有親切感，好過用文書軟件打字吖。
余絲韻