海邊執垃圾 四出探訪

大家唔使擔心，章晟曼只不過係響應花旗喺本周末舉辦嘅全球義工日。好多大集團都會搞義工日，提升員工士氣，又省靚自己嘅招牌，花旗香港亦唔例外，今年已係第4年搞全球義工日，而且義工人數仲刷新紀錄，有成超過2,000人咁多，真係令人興奮。

章晟曼同絲絲講開呢個威水史，都話覺得好鼓舞，所以佢本周末就會與花旗集團北亞區行政總裁鮑史汶，一齊去龍鼓灘進行一個名為國際海岸清潔活動──喺海邊執垃圾。

其他花旗高層當然都會身體力行，個個都帶成村人咁多嘅義工隊，兵分14路出發。好似環球個人銀行服務行政總裁及總經理盧韋柏，就拉埋副總經理周永贊一齊去深水埗同小學生玩花式跳繩；喺開幕儀式打響銅鑼嘅資本市場及企業銀行業務總裁麥永森，就會同小朋友一齊利用廢物做啲小手工；商業銀行部主管兼董事總經理郭炬廷亦會探訪傷殘人士，一齊做臉譜，呢隊人馬仲有成四、五百人咁多，認真墟冚！

余絲韻