金融危機催化提早換班

柳總一向睇好元慶，佢老人家近日出席內地一個管理論壇時話，今次復出係為咗元慶，因為佢話如果自己唔復出，元慶就無法做CEO，柳總更加自喻為元慶嘅後勤部長，要為元慶響董事會爭取足夠嘅支持喎。

此外，柳總仲第一次響公開場合爆料話撤換聯想前CEO阿梅里奧嘅真正原因添，佢話聯想原來諗住五年先換吓管理班底，但金融危機令集團提早咗一年換班，因為金融危機令聯想虧損，而問題癥結就係出於管理，柳總直言之前嘅管理團隊應對危機時完全唔掂，之所以決定撤換阿梅里奧，就係希望聯想可以重拾競爭力，柳總都講得好明。所謂「師徒同心，其利斷金。」柳總今次復出夥拍元慶，絲絲期望會有「一加一唔只等如二」嘅化學效果。

余絲韻