本文重點
利豐（00494）姊妹公司利邦（00891）尋日首日掛牌，成績令人意外，咁高興嘅日子，主席馮國經及副主席馮國綸當然有捧場，不過，可能業務繁忙，大佬馮國經同管理層合照後就好快「鬆人」，反而佢個女馮詠儀就「滿場飛」，呢位富豪第二代係利邦嘅執行董事，負責企業推廣及市場推廣，唔怪得佢咁落力招呼嘉賓同「賓架」。
睇番利邦嘅招股書，發現馮詠儀同老竇、阿叔都係住埋同一幢大廈嘅唔同層數，連座向都一樣，住得咁近真係晚晚可以開會。
送絲絨布畀港交所
絲絲聽朋友講，馮詠儀同佢老竇一樣，都係美國哈佛大學畢業，佢喺○○年已經喺利豐集團幫手，擔任投資經理，之後喺利豐（貿易）做服裝產品開發部嘅高級副總裁，又喺Salvatore Ferragamo Asia 做市場推廣，○七年做利邦嘅董事，咁多年來同時裝發展都好有淵源，相信佢嘅時裝觸覺，喺專門做高級男裝嘅利邦工作，應該會如魚得水。
利邦掛牌，當然按慣例送份禮物畀港交所，絲絲以為利邦會送西裝畀港交所，原來佢哋送咗印咗利邦招股封面嘅絲絨布畀港交所，別出心裁。
余絲韻