本文重點
話咁快又十一月，容乜易又到聖誕、新年。獅子銀行都好識做，上星期向全體同事宣布一個大好嘅訊息，（加薪？未有咁快﹗）就係今年每名員工享有嘅周年晚宴或團隊建立活動津貼，大幅增加12.5%去到450大元，佢哋有啲同事聽到之後嘅第一個反應係「有咁多?」「多過以前喎﹗」
慰勞同事 增加逾一成
講真獅子銀行嘅同事都同公司喺過去一年多，一齊面對好多風風雨雨，依家稍為叫做雨過天青，經濟漸有起色，都應該慰勞吓啲同事。獅子銀行畀每名員工呢類嘅津貼已經連續兩年都係400元，佢哋向來慳家，依家咁大方將津貼增加一成有多，唔知對新一年度嘅加薪幅度有冇啲乜嘢啟示？會唔會係來年調整員工薪酬嘅好兆頭？
再講落去，呢樣絕對唔單止係獅子銀行嘅事，事關佢哋作為全香港最大商業機構之一，佢哋嘅加薪行動將對全港打工仔有着指標作用，為咗廣大市民嘅利益着想，絲絲都好贊成獅子銀行好好咁加員工嘅薪金。
不過，話分兩頭，獅子銀行此舉其實會唔會係預示到好難加薪畀啲員工，又或者花紅凍過水﹖所以喺呢方面做定補償？點都好啦，難得有咁嘅津貼，獅子銀行嘅員工都無謂諗咁多，反正啲津貼又無得折現，不如好好享受呢啲員工福利，盡情吃喝玩樂！
余絲韻