美股真係「咪估」，早前美股係有升唔係又升，搞到其他地方股市都唔知跟好定唔跟好，急升一輪後，近期美股表現走晒樣，早段升幾多可以隨時倒跌凸，認真難搞。美股搞成咁，一眾鑊鏟友仲邊有心機埋頭苦炒，尋日見啲股仔突然無晒力，都知知哋出事，當中更有唔少鑊鏟友埋單計數，睇唔通下，都係炒少鋪為上。
啲股仔死死哋火，加上啲半新股又禾雀亂飛，股市認真危險，我古晨認為都係炒番啲穩陣派，好似隻深圳國際（00152）咁，呢期紅籌股炒重組概念，近期熱晒身，啲炒味都無停過，佢本身業務相對穩定，中期純利亦交到25%增長，就算短期唔得，坐坐吓都有機會翻到身，一於吼實佢，博佢上0.7元，止蝕位方面，古晨認為可以放於0.51元。
古晨