本文重點
去年雷曼兄弟倒閉引發金融海嘯，令無數投資者損失慘重，但當中擺放喺雷曼寫字樓嘅藝術品，近日卻成為不少買家嘅「心頭好」，283件藝術品喺剛過去嘅拍賣會上共賣到135萬美元，較底價76萬美元高出過一倍。買家都將雷曼藝術品視作「戰利品」看待，令競投過程相當激烈。
拍賣好價 當「戰利品」
按照計劃，雷曼藝術品拍賣所得會用作償還予其債權人，不過雷曼欠下債權人高達2,500億美元，今次拍賣款項只係杯水車薪，聊勝於無。今次雷曼藝術品拍賣全程長達6小時，絕對係一次「馬拉松式拍賣」，而當中拍賣價最高係Lichtensteins嘅藍白間條嘅「自由神像」畫作，拍賣成交價4.9萬美元，較底價2.5萬美元高近一倍。
拍賣師就話，買家競投雷曼藝術品抱有獲取「戰利品」心態，佢仲留意到部分買家是前雷曼員工，始終雷曼倒閉是金融海嘯歷史一部分，購買藝術品之餘亦同時購入金融歷史，自然引來各界興趣，利好拍賣價。
余絲韻