忠誠拍賣行鄭世傑話，今日拍賣嘅兩個新填地街單號平台戶，實用面積同為583方呎，現分別間咗幾間房仔出租，開價同係195萬元，呎價3,345元，計落租金回報率有成8厘，有興趣買家可以一邊收租，一邊博收購，不過平台嘅僭建物就要新業主自己負責。

同場另一個有收購價值嘅物業係鰂魚涌吉祥大廈中高層B1室，實用面積543方呎，開價150萬元，呎價2,762元，Vincent知道，該幢大廈近年曾經有財團出價收購，不過最後因為收唔夠九成業權而擱置。

代理內地資格互認快落實

地產代理監管局積極為代理業界搞內地嘅資格互認，希望代理們可以盡快喺內地工作，擴闊發展範圍。Vincent打聽到，地監局昨已向立法會提交有關附屬條例嘅修訂建議，原來今次嘅資格互認計劃有效期為五年，首年每方最多可提名300名代理互認資格，其後四年名額就待定，相信要視乎反應而定。按現時進度，預計新修訂條例會在十二月七日生效。據聞，地監局正馬不停蹄制訂推行嘅具體安排，希望可以盡快落實推行。

（Vincent Lau）