查實呢班拳手好多都係銀行家及對沖基金經理，大部分都唔知「Boxing」點打，佢哋一放工就不停喺「Gym房」訓練，經過5個月嘅艱苦鍛煉同埋幾輪篩選，佢哋已經有足夠體能應付3個回合嘅決賽，每回合歷時兩分鐘。今次活動係冇任何花紅分發，只為「微笑行動」及「奮進行動」籌募經費，決賽當晚就籌得善款100萬元。

Jesse屬於輕量級嘅拳手，身高1.64米，綽號「Happy Feet」，除咗孖妹外，當晚有好多「粉絲」為佢吶喊，搏擊時佢不停耷低頭，避開對手猛拳，有幾次仲差啲被打到跌低，但最後佢猛攻對方身體而成功得分。佢一打完比賽，孖妹即刻行埋佢身邊恭喜佢。

靈活「快閃」採取主動

莉莉︰ 恭喜你打贏咗，見到咁重量級嘅對手，你喺台上諗緊乜嘢？

Jesse︰ 咁多「戰士」中，我係最矮嗰個，哈！冇諗過我都可以做「Rocky Balboa」（拳王洛奇）！其實練拳冇你睇得咁易，練習完後隻腳簡直寸步難行，我足足成個禮拜上唔到樓梯，過程真係好辛苦，需要保持好高嘅紀律性，依家打完，感覺好舒服。頭先喺台上淨係諗策略，諗吓打邊度可以攞多啲分，其他乜都唔諗。

高妹︰ 就好似散戶咁，彈藥永遠唔夠大戶多，形勢上已經蝕底咗，咁你會點做？

Jesse︰ 惟有不斷諗方法去贏，點樣避過人哋嘅拳頭，我嘅對手係空手道黑帶三段，佢每日會操練兩次，變相逼我加緊練習，可能因為好驚被人打，擔心個頭會受重創。你知我身形細小，所以選擇「快速閃避」，希望用靈活嘅雙腿，避開對手攻擊。所以有晚喺酒吧，朋友幫我起咗「Happy Feet」嘅花名，嗰晚我飲多咗幾杯，成晚仲不停跳舞添。

莉莉︰ 我哋都好驚輸，所以都會不斷做功課，避開「有毒」嘅股票，你嘅投資態度又係點樣？

Jesse︰ 金融市場同打拳一樣，打拳時你要諗點樣攞第一，最緊要揮出第一拳；喺市場上，你要時刻採取主動，叻過你嘅競爭對手。所以我嘅人生觀係「凡事都要積極，就可以獲得美好人生」，之前我做過心臟手術，癌病又纏擾我，但我都可以逐一擊敗，呢個精神喺呢度就發揮到出嚟，仲成功打贏對手。

高妹︰ 你真係好犀利，我都要喺呢個牛市升浪中積極搵靚股。比賽之後，你第一時間想做乜？

Jesse︰ 當然要盡快同朋友飲番杯，呢5個月特訓，為咗控制體重，食嘢好小心，幾乎滴酒不沾，落酒吧都只係叫「Latte」，朋友仲笑我添。

散戶積極撈貨未驚過

搏擊場上仲有位拳手叫John Crane，係歐洲大型另類投資基金3A Asia嘅主席，佢年紀係最大，啱啱過咗49歲生日。比賽時John好少出拳，孖妹睇到好緊張，以為佢會輸，但果然「薑愈老愈辣」，最後佢都掂咗。打完後佢同孖妹講，話估唔到自己會贏，仲好型咁拋出一句︰「呢啲咪係Surprise囉。」

都真係好「Surprise」，上個禮拜尾孖妹落魚缸就知，散戶見到股市連跌3日，佢哋冇防守之餘，仲異常亢奮，積極入市。耀才證券散戶李先生話︰「上個禮拜恒指連跌3日，我係保守咗，小注買入幾隻股票玩吓；當大市升勢強勁時，我就採取積極進攻，投資金額會大番啲」。

坐喺旁邊嘅散戶蘇先生都好認同咁話：「炒股最重要係知己知彼，明知股市係由大戶控制，咁自己就要識得『審時度勢而行』。正所謂『風趁火勢，火趁風威』，只要做足功課，任何市況都可以賺到錢。」即使今個禮拜唔知美股會唔會繼續做好、恒指有冇機會再創新一個浪頂，但大家對股市變得有信心，暫時都算係好事。

30%股友想玩本周新股

不過，覺得依家估值偏高嘅股友，今個禮拜可以試吓新嘢，因為有幾隻新股掛牌，早前新股招股唔理想，今次部分新股嘅招股價就用下限做定價。據今期《東方產經》網上民意調查，截至上周末晚上6時，30.8%股友話會投資本周嘅新股，69.2%就話唔考慮玩。

孖妹近排好開心收到股友電郵問股，有位散戶劉先生喺3個月內3次分段買入中國忠旺（01333），平均價係8.45元，由於股價一直下跌，佢依家正煩惱緊究竟應該繼續持有，抑或止蝕離場？

我哋就問咗泓福資產執行董事鄧聲興嘅意見，佢話：「忠旺屬於工業股，現時內地大搞基建項目，對工業及建築鋁型材產品需求大。但由於忠旺招股價7蚊定價太高，新上市之後『炒味』又勁，令價格偏高。」佢建議劉先生應該喺8元時沽出一半或三分之二股份，7.5元樓下再買入，保持呢個策略走幾轉，應該可拉低成本甚至賺到錢；不過如忠旺跌穿7元，屆時就要做止蝕。

（莉莉）（高妹）

若有料報畀高妹同莉莉或有嘢問，可電郵money.biz@opg.com.hk