美股異常波動，自從道指升破萬點後，走勢開始反覆，搞到港股唔知跟好定唔跟好，結果來個半天吊。如果計市場氣氛，上個禮拜整體唔差，好多股仔都開始發難，有番啲炒味，點知美股亦同時玩插水，今鋪真係玩死我哋班鑊鏟友。美股腳軟軟，港股亦可能跟住散，作為炒家真係要打醒十二分精神，如果啲嘢唔得就一定要走，保本為上。
美元趨向係貶值，就連四叔都話要套現換磚頭，所以古晨覺得資源始終有價，內地電廠開始回復盈利，對煤炭需求有增無減，煤炭股最值得投資保值。恒鼎（01393）為內地三大煤炭集團之一，有一定實力，近期股價橫行十足收集形態，守住20日線嘅7.93元，走勢仍算靚仔，不妨作為中線吸納對象，話唔定明年會有驚喜，向上要睇10元都唔難，至於止蝕位則可定於7.3元。
古晨