本文重點
美國史丹福大學嘅胡佛研究院課室，睇嚟會逼爆學生和擁躉，何解？因為有「金錢甜心」稱號嘅CNBC王牌新聞主播瑪麗亞巴蒂羅姆（Maria Bartiromo）將會走出直播室，走入呢間著名研究院課室內開班授課，作為有料又夠靚嘅新聞女王，一定受學生歡迎。
研究院開班授課
貴為電視台王牌主持嘅巴蒂羅姆，最令外界難忘嘅必然係每日於紐約交易所開市前嘅現場報道，既有動感，又有堅實嘅華爾街消息披露。王牌主播今次當然唔係放棄做主播轉行去教書，只不過係被史丹福大學委任為名譽教學助理，喺胡佛研究院設壇授課，對於擁有強大財經人脈嘅巴蒂羅姆，相信必然有無數財經故事與學生分享。
事實上，巴蒂羅姆絕對係既美麗又有料，佢畢業於美國紐約大學，主修新聞，副修經濟學。
唔講唔知，新聞女王畢業後首份工作非常特別，竟然喺意大利餐廳內任職衣帽間，嗰間餐廳仲係佢父親做主廚嘅，或許見盡形形式式賓客，為日後建立財經人脈打下咗基礎。
余絲韻