本文重點
香港雖然係石屎森林，但事實上仲有好多優美天然環境，值得大家保育。中信嘉銀亦有同感，佢哋嘅銀行義工隊就帶咗一班新來港兒童，一齊去咗以天然環境見稱嘅海下灣，增進下一代對環境保育嘅認識。
義工領遊海下灣
中信嘉銀與綠色力量合作，上周六為一班來自基督教勵行會嘅新來港兒童，搞咗個海下灣海岸公園生態遊。當日18名銀行企業義工隊成員陪同25位新來港兒童，一齊欣賞珊瑚礁、紅樹林及其他海洋生物。
絲絲睇過啲資料，原來海下灣就好似米埔一樣，唔係話去就去，政府一直都監控郊遊人士數目。海下灣係香港首批海岸公園，位於西貢西郊野公園嘅北端，仲係香港唯一可經由陸路前往嘅海岸公園！
中信嘉銀有7位企業義工帶埋自己仔女出席，等小朋友都一嘗做「小義工」嘅滋味。當然唔少得領隊喇，綠色力量派出3位導賞員沿途講解環境保育嘅重要性，相信小朋友參觀完都獲益良多！
余絲韻