本文重點
聯通（00762）與中移（00941）就引入iPhone到內地賣而鬥得難分難解，最終由聯通先勝出第一回合（皆因中移老總王建宙至今仍然向外強調仲同蘋果公司傾緊合作），聯通近日公布將於本月三十日（本周五）晚上6時至翌日凌晨6時，喺北京嘅「世貿天階」舉行iPhone手機進入中國大陸市場嘅首銷儀式。不過老實講，水貨iPhone一早就入去內地，而且聯通版iPhone又無WiFi功能，仲要唔係平過人，所以市場唔係咁睇好聯通版iPhone嘅銷情，絲絲亦唔覺得奇怪。
簽約兩年要用貴Plan
但咁辛苦爭個代理權返嚟，聯通絕對唔會乜都唔做，聽講聯通明日會採取限量方式發售，用戶只能買到999部iPhone，大鑼大鼓先賣得嗰900幾部，相信會製造到搶購熱。咁都仲未止，內地媒體尋日引述消息人士透露，話聯通明日會開始向內部員工配發iPhone，聽講內部員工價係免費，絲絲初頭以為聯通咁益班員工，但後來睇真吓，原來聯通要員工簽約兩年，而且仲要每月承諾用186元人民幣嘅高月費計劃添。咁樣谷法，聯通版iPhone嘅銷情差極都有限。
余絲韻