Q：身兼多項公職叫「公職王」，同時做最多上市公司董事的「董事王」係邊個？

A：鄺志強。老實講，我真係無諗過係佢，甚至唔識佢。鄺先生同時擔任16家公司的獨立非執行董事，包括恒地（00012）同平保（02318）。佢第一次「入局」係九八年加入天津發展（00882）。緊隨其後嘅石禮謙知名度應該高少少，佢有15項董事銜頭。

Q：邊間上市公司有最多董事？

A：包括執行董事、非執行董事同獨立非執行董事，平保董事會共有25人。其次係有24人嘅港鐵（00066），滙控（00005）及中電（00002）亦有21位董事。不過，有兩間上市公司只得一名董事，似乎係公司提供資料時有錯漏。

Q：市場總共有幾多人做緊上市公司董事？

A：本港主板加創業板公司共11,397個董事位置，現由8,982人分擔。以香港勞動人口約370萬計，即係唔夠0.25%人做緊董事。現役上市公司董事中有745人次姓「陳」，順序就係陳、李、張、王。

Q：目前在任的上市董事中，邊一個最資深？

A：創興銀行（01111）主席廖烈文喺一九五五年三月十七日獲委任做董事，緊隨係同於五八年三月十七日「入局」嘅創興銀行CEO兼MD廖烈智，仲有執董廖烈武。

其實上市公司有唔少「明星級」董事，唔止有「張國榮」同「黎明」，仲有兩個「李小龍」。唔係撞邪，係撞名啫。

（大健）