本文重點
保險商ING早前搞咗個演唱會，當晚ING香港/澳門地區保險及退休金行政總裁韋立俊（洋名John）都有上台表演，仲同「校長」譚詠麟合唱一曲《朋友》，尋日佢又再次獻唱，喺銀包攞番張「貓紙」出嚟即席表演，一班同事又拍手又跟住唱，場面鬼咁溫馨！
英文拼音練唱《朋友》
當晚嘅演唱會係慶祝ING廿五周年，所以就搵咗年年25歲嘅譚校長做表演嘉賓之一。阿John上任唔夠一年已經好投入，本身完全唔識廣東話嘅佢，靠同事幫忙將廣東話譯做英文拼音苦練唱《朋友》，估唔到當日張「貓紙」仲跟身，尋日同絲絲食晏時高歌一下，仲唱得好好聽！
阿John話，ING未來要做香港新做壽險業務嘅五強，希望往後整體壽險生意都入到頭五名位置。ING第三季保金收入按季增長13%，保單數目較去年同期多3%，阿John話佢哋會繼續增加人手，依家有1,400人，年底會再多100人，明年仲話要加到有2,000人喎！
余絲韻