本文重點
金融海嘯過咗一年，世界好似無乜變過，尋日美國證監會前首席會計師Lynn Turner嚟咗香港，喺美商會一個午餐會演講，佢話依家華爾街啲貪婪「賓卡」花紅照派，同海嘯前無分別，一提起聯儲局前主席格林斯潘好多年前同佢哋講，話唔使銀行披露咁多嘢嗰陣時，佢幾咁驚訝。
寬鬆披露種下禍根
Turner話，好多年前已開始籌備唔同法案，希望銀行提高透明度，銀行去做次按、做高風險投資搵高回報無問題，但監管機構一定要知佢哋承受咗幾大風險，不過好多建議都畀聯儲局否決晒。因為格老信奉自由市場，相信市場會自己作出修正，不過之前喺聽證會上，格老已經承認睇錯。
格老話銀行有少少資料唔披露冇乜問題，Turner就話咁做相等於同個細路仔講你可以講少少大話，最後個細路只會愈講愈多。佢仲認為美國針對金融機構嘅改革，好有可能要等醫療改革搞掂先至可以明朗化，即係要下年第一、二季啦。
余絲韻