本文重點
香港商品交易所計劃喺本季推出首個產品──黃金期貨合約，依家籌備工作正進行得如火如荼，絲絲尋日登入商交所嘅網站，發現商交所董事會已加入3名執行董事，包括主席張震遠、副主席楊孟欣及行政總裁艾伯特。連同商交所早前公布7名猛人，包括錢果豐、樊綱、何潮輝、康典、陸恭蕙、文禮信及王于漸加入做獨立董事，商交所董事會依家已增至10人。
股東委派陣容惹關注
張震遠早前話過，董事會總人數應該約有17人。絲絲估計，應該仲會有啲由股東委派嘅董事入局，聽聞整個董事會成員名單短期內會公布。
絲絲一直好有興趣知道商交所有邊啲股東入局，尤其喺金融海嘯後，唔少投行大執位或變身，大家不妨對董事會名單拭目以待，到時應該會聯想到商交所有邊啲股東。
至於商交所副主席楊孟欣，相信外間亦好有興趣知道佢嘅背景，根據商交所網站，只透露佢係中國著名藝術家、金融學家及經濟學家，其他履歷等一概欠奉，介紹好似簡單咗啲喎！
余絲韻