大市連日勁升，加上銀行息口又低，真係焗番啲銀行存款湧出來買貨，近期大市升勢慢慢擴展至二、三線股，啲嘢炒味濃番，連帶一眾鑊鏟友都生猛番晒。美元轉弱，金價升勢停不了，金礦有得搞，自然有唔少醒目人士想沾手，好似早前炒風甚勁的瑩輝集團（01163），終於宣布其變身大計，集團擬斥資74億元收購內地8個金礦，現時金價咁勁，瑩輝轉型掘金，自然大把人跟進。
睇番今次收購細節，其中69.5億元將以可換股票據進行收購，換股價係0.6元，等同話畀市場知呢個係底價，難怪消息公布後，股價即時炒咗上去，現時壓住喺0.8元樓下收貨，如果金價再暴升，睇怕幕後想壓都壓唔住，不妨現價買番少少，向上隨時見1.2元，止蝕位可放於0.68元。
古晨