唔夠人開會可能係與翔龍基金散戶太多有關，根據絲絲經驗，如果散戶對議案冇乜反對意見，通常都唔會去，就好似選舉一樣，個個以為大熱門一定跑出，唔使我去投都得喇，於是冇去投，結果就大熱倒灶。

大戶撐回購冇有怕

滙豐環球投資管理董事兼亞太區策略業務發展主管謝國誠話，機構投資者大約持有該基金10%至11%，佢哋都好支持呢個回購。謝國誠認為今次唔夠人開會唔會對回購安排有影響，至於會喺乜嘢價位出手回購？佢就話如果長時間出現20%至30%折讓，就會密切關注呢個情況。

完場嗰陣有股東嬲嬲地投訴無息派，不過謝國誠話○七年上市嗰陣，一早已講明無計劃派息，因為新興市場基金多數回報都係體現喺資產增值方面，不過佢都補充話，咁都唔一定代表唔派息，明年七月佢哋經QFII投入內地嘅錢可以解禁拎番出來，到時就可以提高靈活性。

余絲韻