上個禮拜《炒房》推介嘅精選股比亞迪（01211）、長實（00001）和駿威（00203），表現算唔錯。恒指上周升咗2%，內地汽車股受惠於銷售數字理想，升勢凌厲，帶動比亞迪創歷史新高，上周升近12%，駿威亦高見3.87元，升4.5%。
本周股友仍憧憬內地汽車股有得升，僑豐證券北角分行經理譚梓業推介華晨中國（01114），因其他汽車股已被炒高，估計資金轉炒落後嘅華晨中國，目標價1.2元，料一至兩周可達標。
內房股近排走勢偏軟，股友期待內地地產商有新項目刺激，他就睇好眾安房產（00672）。該公司啱啱喺杭州買咗新地皮，暫時計劃會興建私人別墅，而附近又冇咩同類型房屋，有利鞏固市場地位，料股價可衝上3.3元。另外，今年三月先掛牌嘅木薯資源（00841），主要從事東南亞地區乾木薯片嘅買賣，行業夠晒獨特性，佢就嚟公布業績，料轉虧為盈，可炒一轉。
（高妹）