孖妹當然想了解「少男心事」，曾為交易員嘅操盤手、RBS旗下荷銀股票衍生工具及私人投資產品亞洲主管黃集蔚（Matthew），以及德國F1賽車手羅辛柏格（Nico Rosberg），工作上都遇過心理關口。Matthew喺職場上扶搖直上，短短一年間已升至主管級；Nico今年只係24歲，被譽為新一代F1賽車新星，目前喺○九年F1賽車手榜排名第七，現隸屬威廉士車隊。

絕境求生 衝破難關

Matthew︰ 講到辛苦都係「未真正上到位之前」，以前做期貨出市員時，同揸車一樣都要分秒必爭，身體亦要承受好大壓力，要長時間企又冇得去廁所，體能消耗正如連續打4個鐘頭籃球，可以話係一個難關！

Nico︰ 早期做賽車手最辛苦，係事業上一個關口。比賽機會唔係成日有，當機會嚟到就要好好把握，所以每次都會不斷苦練，仲會花長時間同工程師密斟。

Matthew︰ 當熊市來臨一剎那，係好辛苦，分分鐘會被叮走，所以要諗方法「絕境求生」，有得贏就要贏！由九四年熊市到依家，最慘都係「沙士」嗰時，成個經濟係最差，要不斷諗方法搵新生意。

Nico︰ 輸咗就要學習收拾心情，講到尾，只要勤力就可以撐過去。我比較幸運，「Get the right place at right time」（喺適當嘅時候做啱咗嘢）。

莉莉︰ 咁你哋點樣備戰每一場仗？

Nico︰ 比賽前好少落場試車，因為要控制成本，每次賽車，成70個人走落去幫手，一年要換幾次引擎，所以唔會訓練太多。反而比賽前要操Fit自己，每日跑步、踩單車提升心肺功能，嚟到亞洲，就要專心調校時差，夜晚盡量少出街。

Matthew︰ 今年股市升到興烚烚，但衍生工具市場就未有跟上，惟有先攻澳洲和日本等冇咁多限制嘅國家。

角色互易 按部就班

高妹︰ 聽講Matthew都鍾意賽車，Nico亦有投資？

Matthew︰ 我性格鍾意玩，曾經喺英國上過短期賽車班，但揸得唔快。

Nico︰ 我出糧係用美元，平常支出多數係用歐元，去年當歐元大跌，我唔識做外匯對沖，人工就咁蝕咗20%。今年初我喺1.28買入歐元，1.45走人，成績都算滿意。

莉莉︰ 近排歐元不斷升，會再追入嗎？

Nico︰ 我仲喺學習階段，鍾意「Step by step」（按部就班），投資唔追求高回報，但求自己開心，我早前都有投資歐元債券指數。

股友畏高 緊盯美匯

恒指衝破22,000點後，缸友都話怕怕，未敢買貨，訊匯證券觀塘分行散戶鄧小姐說：「恒指上到22,000點先得人驚，一定係大戶想引散戶入局，然後殺晒我哋。總之，恒指去到20,500點先安全區。」

天行證券觀塘分行散戶黃先生話：「我嘅心理關口係以恒指升或者跌2,000點做分界線，如果恒指跌超過2,000點，人哋沽貨，我就買貨。」

個市曾經升破22,000點，好多散戶入咗熊證，咁做似乎鹵莽。後市點睇？訊匯證券觀塘分行客戶經理方振龍教我哋用美匯指數走勢做基礎，因為美匯往往同股市呈相反走向，依家美匯一直尋底至一年低位，若掉番轉頭行，大家可以諗吓會有乜事發生。

環球市場升到呢度，今個星期有冇得再突破，企穩呢啲心理關口樓上，冇人知，但至少曾經路過，已振奮一下股民嘅心，令人憧憬股市可更上一層樓。

未來嘅事無人知，但當前最怕嘅當然係「綠色炸彈」，今年稅貸夠低息，大家會唔會借稅貸，甚至借嚟做投資？今期《東方產經》網上民意調查顯示，截至上周末晚上6時，10.2%人話會借錢交稅、25.4%人話會借多啲用嚟投資，而話唔借以及考慮中嘅分別有59.3%及5.1%。

講番今次操盤手同賽車手碰頭，原來Nico參加嘅賽事由RBS贊助，RBS仲贊助高爾夫球、網球及木球，今次Nico訪港，荷銀順道發售慈善獎券，為香港遺傳乳癌家族資料庫籌款，獎品包括Nico親筆簽名嘅頭盔，本月係「國際乳癌關注月」，善心人要多多支持喇。

莉莉

若有料報畀高妹同莉莉或有嘢問，可電郵money.biz@opg.com.hk