歐美企業業績頂呱呱，喺美股帶領下，港股亦創下今年高位。大市死唔去，鑊鏟友又再手癢癢，近日啲股仔表現都好番好多，雖然現時市面嘅炒味無八月時咁勁，但太耐無嘢炒，市場點都會搵機會炒番轉，最重要係早前調整咗咁多，市場大把平貨買，只係睇你煲唔煲得中而已。
上個禮拜二，古晨已經提醒大家要留意隻寶威（00024），事關古晨見佢喺0.25元橫行咗成四個幾月，收咁耐貨自然有後着，結果連升幾日，認真犀利，上周五謎底終於解開，原來係轉型玩磁鐵礦業務。古晨唔係礦務專家，唔知個礦有幾巴閉，不過睇幕後炒法，都知隻嘢街貨有幾乾，既然幕後都喺0.25元收集，斷估要炒上見0.5元都唔出奇，難得近期咁熱鬧，不妨跟進炒番轉，最多跌穿0.35就止蝕。
古晨