本文重點
講起合和實業（00054），好多人都會諗起港珠澳大橋，因為合和多年嚟積極推動呢個項目，並爭取參與興建。剛啱升任合和董事總經理嘅胡文新（洋名湯馬士）尋日就自爆話，舊年知道大橋會由三地政府牽頭建設後，曾經一度諗過將合和基建（00737）私有化。
但當時正值金融海嘯，合和覺得呢個時候提出私有化唔係咁恰當，故最終選擇將預留用喺港珠澳大橋嘅資金，大派特別息回饋股東。湯馬士仲話，合和基建會繼續維持派高息政策，派息比率唔會低於75%，隨時派100%添！
胡文新展望黃金十年
湯馬士早排由聯席董事總經理升任董事總經理，原來今年亦係湯馬士畢業後加入公司第10年，尋日佢出席公司股東會後被問到正式「坐正」有乜感受，佢就好謙咁話希望未來10年公司可做出更好成績。
余絲韻