本文重點
國際證券交易所聯會（WFE）成班高層上個禮拜喺加拿大溫哥華開年會，身兼WFE副主席嘅港交所（00388）行政總裁周文耀自然有參與，仲同主席夏佳理一齊出席。心水清嘅朋友應該會留意到，WFE副主席呢個位明年底至到期，但周文耀明年一月就榮休，咁呢個得來不易、喺國際社會上有一定地位嘅WFE副主席個位會由邊個頂上呢？
「賓卡」估夏佳理機會高
據了解，WFE主席、副主席等職位係以交易所做單位，因此周文耀退休之後後，WFE副主席個位係咪順理成章由夏佳理或李小加接任，大家就要拭目以待。
不過有資深「賓卡」就話夏佳理接任嘅機會可睇高一線，因為佢做港交所主席已咁耐，亦曾多次參與過WFE會議。
另外，證監會主席方正嘅3年任期喺下星期一（本月十九日）屆滿，根據經驗，政府通常會喺最後一日先會公布係咪續約。不過絲絲就留意到證監會網頁嘅最新活動消息一欄，方正喺下月已安排出席兩個活動，一個係十一月十日由財務策劃師學會舉辦嘅財務策劃周年會議，另一個係十一月二十四日由董事學會舉辦嘅傑出董事獎頒獎典禮，睇嚟佢續約已坐定粒六。
余絲韻