本地魚缸昨日早段做好，下半場開市後，多得祖國魚缸午後升幅擴大，帶動恒指高見21,679點，升379點。不過，祖國魚缸散場後，歐洲魚缸接力腳軟，本地魚缸亦從高位回落，升幅收窄，恒指散場報收21,467點，升168點，期貨場更轉炒低水。國企指數盤中高見12,625點，散場報收12,507點，升131點或1%，跑贏恒指。現貨場成交額略增至604億元，值得留意係期貨場未平倉合約正在增加，唔知大戶呢個月想開大定開細，古勝烏卜卜。

大戶睇定散戶嚟食

在下講過，近幾個月本地魚缸成交額唔算大，大戶要操控易如反掌，開大開細當然唔係睇大戶心情，而係睇散戶做好定做淡，然後開相反殺倉。

要知散戶開邊瓣，古勝提議參考窩輪跟牛熊證資金流向，上星期資金淨流入做淡，恒指短短幾個交易日挾高逾千點，幾十恒指熊證被判死刑，大戶挾淡倉動機相當明顯。尋日恒指高開低收，期指又轉炒低水，大戶短期挾淡行動或告一段落，但在魚缸資金充裕下，加上未見有利淡消息，古勝睇唔到魚缸要向下大屠殺的理由。

「油魔」近日精神爽利，昨日油價在亞洲時段高見74美元，帶動相關油股上升，中海油（00883）升3%，係大隻佬升幅冠軍，中石油（00857）升2.4%，中石化（00386）未能完全受惠油價上升，升幅不足1%。

寶龍登場有所期待

新丁神冠（00829）勁升四成，係今年最賺錢新丁，刺激今日登場的寶龍地產（01238）龜孖屐價急升四成，即管睇寶龍有無神冠咁本事。口痕友話神冠跟寶龍在招股時，同樣唔係太受歡迎，偏偏登場表現叫缸邊友另眼相看，在下則認為正因唔係太多散仔參與，指揮官自然勝券在握。

近來新丁表現生猛番晒，唔似得之前嗰批新丁，登場即潛水，半新丁再受捧，昨日琥珀能源（00090）急升近一成，報收2.13元，成交亦顯著上升。琥珀從事天然氣發電，在浙江省經營發電廠，由於天然氣發電不會排放任何微粒及二氧化硫，所以琥珀具環保概念。

琥珀於七月登場時，招股價1.66元，最高價3.12元，較招股價升逾八成，昨日報收2.17元，較高位回落接近1元，有條件博反彈。不過，琥珀最值博地方，係其晒士細，兼且貨源歸邊，要炒上可以話易如反掌。睇番琥珀發行股數4.15億股，市值不足10億元，而大股東已持有逾七成股權，即係街貨兩成幾，實際不過值2億幾銀。

概念備受芬佬青睞

琥珀既有能源概念，又具環保概念，只要有芬佬對其產生興趣，一個基金已可以買起琥珀所有街貨，當然呢個只係古勝假設，加上基金通常有買賣條款規限，唔見得邊個單一基金，會買入單一間公司超過兩成股份。

不過，表叔買貨就無束縛，只要有一個私募基金睇得起琥珀，隨時三兩吓手勢已吸盡街貨，到時股價想點升就點升，炒股唔好大貪，再睇埋基本因素，有權見番七月份上市高位。

古勝