本文重點
今年第十屆世界華商大會喺下月就會於菲律賓舉行，香港中華總商會蔡冠深話，已經有國家領導人落實出席，不過佢就話要賣個關子先，等外交部公布，香港嘅代表團就已邀請咗退咗休嘅任志剛出席，不過任總暫時未有回覆。
下月底馬尼拉舉行
世界華商大會每兩年舉行一次，目的係畀世界各地華商聚首一堂，傾吓當前面對嘅問題，同埋睇吓唔同地方有乜嘢投資機遇，嚟緊一屆喺下月底就會於馬尼拉舉行，菲律賓總統阿羅若夫人仲會親自做主禮嘉賓。
絲絲睇番個日程，有論壇嘅主題係關於國際金融業及危機嘅關係，做生意當然同銀行借唔借錢息息相關，呢啲直頭係任總嘅強項，如果佢肯同班港商一齊赴會，相信大家都有好多嘢分享，對於退休歎世界嘅任總嚟講，又可以順便遊吓埠，不知幾過癮。
蔡冠深估計最終會有200名港商參與，佢自己之前忙緊「十‧一」嘅嘢，完成埋呢個華商大會都差唔多成十二月，之後到聖誕佢就可以乘機抖抖喇。
余絲韻