正所謂活到老、學到老，尤其喺呢個日新月異、講高科技嘅社會，學用電腦、學上網的確非常重要，尤其係滙豐由上星期日開始，採用網上理財電子結單及電子通知書服務，好多客戶都要透過電腦互聯網登入私人網上理財戶口。

捐200萬辦入門課程

滙豐嘅客戶涵蓋老中青，長者當然都想學上網查自己戶口啦。滙豐就與香港家庭福利會合作，捐贈200萬元舉辦一系列互聯網入門課程，灌輸基本互聯網知識，包括教授基本嘅電腦及上網知識技巧、介紹常用嘅網站、講解互聯網保安問題等。

韓克強今次就特登去探吓呢班上緊堂嘅長者，了解課程嘅實際情況，又聆聽參加者意見，繼續提升課程質素，仲大讚佢哋勇於學習新科技及知識嘅進取態度！

余絲韻