本文重點
近期新股多籮籮，股民未必隻隻都識得，不過，喺內地從事地產業務嘅花樣年就可能好多人識，因為佢個名夠特別，令人諗起電影《花樣年華》。花樣年主席潘軍尋日就親自解畫，佢話公司個名同套電影完全無關，反而與一首國語老歌有關。
名字取自周璇金曲
話說公司喺九六年成立時名叫星彥投資，但旗下地產代理業務個名一樣叫星彥，後來管理層發現好多人將兩間公司撈亂，所以決心改名，喺○○年豪花1,600萬元，搵咗間國際知名嘅廣告公司諗新名及新標誌。
潘軍話，嗰陣佢得廿幾歲，希望公司個名可以又年輕、又富活力，國際化之餘又不失中國味道，後來佢諗起一首周璇嘅名曲《花樣的年華》，又覺得3個字嘅公司名比較「靈巧」，就用花樣年呢3個字做公司名。佢仲話希望呢個咁浪漫嘅名，可以為住戶帶嚟幸福時光！
花樣年另一位掌舵人曾寶寶原本尋日都會見傳媒，潘軍就爆料話，寶寶原本已準備好盛裝赴會，化妝師都請埋，點知可能呢排見投資者成日要周圍飛，操勞得滯搞到皮膚敏感，女仔始終貪靚，所以暫時同傳媒緣慳一面。
余絲韻