會計師公會嘅周年晚會，年年都係差唔多，但今年終於有突破。會長Paul Winkelmann早前向會員發表通函，話今年十二月七日喺會展舉行嘅周年晚宴會一反傳統，唔再咁官式化，等會員可以盡情玩番晚，絲絲心諗啲會員都應該幾受落。
着重聯誼唔再公式化
絲絲記得，會計師公會每次周年晚宴，都會例牌邀請高官做主禮嘉賓，場面真係幾公式化，但今年可能會令人耳目一新，因為Paul Winkelmann喺信中講到，今年嘅晚宴將會首次放棄用正規形式，較為着重聯誼性質，因為會員過去一直都有要求，寧願晚宴多啲時間傾偈，少啲時間進行儀式活動。
為咗配合今年嘅新形式，今年晚宴只會邀請小量主禮嘉賓，仲有會員同藝人嘅娛樂表演，又會加插跳舞、遊戲環節，並設置一個漫畫檔口，替在場人士畫牛仔、牛女肖像；更重要嘅係，晚宴每位只收480元，係原價720元嘅三分之二。
搞唱K比賽挑戰各界
Paul Winkelmann話，今次晚宴只係會計師公會其中一個轉變，證明佢哋有聽會員意見。除咗晚宴之外，會計師公會嚟緊嘅星期日舉辦卡拉OK比賽，會員同註冊學生都可參加，贏咗仲有機會代表會計師公會參加專業人士界別喺下月一日舉行嘅唱K比賽。
余絲韻