市場氣氛同前一個星期前比較，有一百八十度改變，新股表現好番些少，永利澳門（01128）首日掛牌收10.78元，較招股價10.08元升6.9%，卜架老友話澳洲加息，估唔到救番班接到一手都係嘅孖展新股客一命。睇番八月底至今，唔少新股潛水，唔少新股仍低過招股價介乎5.1%至41.4%，呢一批新股狂潮下，保薦人普遍定價比較高嘅公司，幾時返到家鄉？只有天知曉。

筆者今日想寫工業股，其中電腦周邊產業最令筆者有興趣，最近統計機構Gartner公布，美國及亞洲市場開始重拾動力，個人電腦市場有復甦迹象，第四季付運量出現正增長。早前亦有大行調高一○至一二年電腦付運量，估計未來三年增長會介乎8%至10%，一來海嘯的陰霾逐漸遠去，其次市場對微軟新作業系統Windows 7，都抱有厚望，月內上市相信會有助硬件更新的需求。

筆者記得Vista上市前電腦股都炒過一輪，今次Windows 7可以吸引用家換機？抑或像Vista一樣雷聲大雨點小？由近期一些Windows 7預告，筆者傾向悲觀，但毫無疑問近年電腦在多媒體應用上，愈來愈普及，液晶顯示屏尺碼愈來愈大去配合功能，銷售表現也勝過電腦主機本身，在有得揀下，筆者對顯示屏生產商更感興趣。

上半年毛利率擴闊

心水股冠捷科技（00903），是全球最大液晶顯示屏及電視機生產商，上半年全球電腦出貨量微跌，電腦用顯示屏亦然，但電視機品牌商外判生產上升，頭六個月液晶電視機付運量大升62.7%，去到340萬台，表現唔錯，而主要零部件LCD Panel價格比去年回落，上半年毛利率由4.9%擴闊到5.7%。

綜合大行預測，冠捷最壞時刻已過，○九年純利預測1.17億美元，較○八年低潮時的9,718萬美元，回升兩成，而一○及一一年估計跟隨整個電腦行業，提供大約一成年增長，估值亦唔算高。另一令人憧憬的，是信息產業部旗下的長城計算機，進身大股東後未有大動作，會否大舉進軍內銷市場，可能性確係未可抹殺。

戴峰修