絲絲收到風，富邦香港（00636）最近檢討緊內部員工守則，當中包括要求員工披露投資組合，仲要求員工幫襯番該行嘅證券投資業務，惹起部分員工不滿，聽講金管局都收到相關投訴。
唔少大企業都有利益申報嘅員工指引，但乜嘢級數嘅員工先要申報，就要視乎行業及企業管治嘅鬆緊程度。有傳聞話個別富邦管理層同員工講，話呢啲嘢係應金管局嘅要求！
要強迫用番自己銀行嘅證券服務嘅要求，絲絲就認為值得商榷，如果係真嘅話，似乎剝奪咗員工嘅自由，難怪有員工忍唔住投訴。據絲絲所知，依家富邦仲喺檢討階段，收集緊員工意見，有共識先至會落實，喺披露投資組合方面，聽講只係負責賣投資產品嘅員工先要做，當然最終係點就要拭目以待！
余絲韻