本文重點
英國烹飪節目《大城小廚》嘅靚仔廚師主持人Jamie Oliver，將於香港開辦佢喺亞洲區嘅第一家意大利餐廳，我諗大家都知，不過原來佢嘅發展宏圖唔只咁簡單，佢計劃緊集資2,200萬美金，即係成1.7億港元去拓展亞洲業務，估唔到Jamie盤生意做得咁大。
搵老細定5年大計
Jamie同佢嘅合作夥伴Tranic Ltd.嘅計劃係希望搵到一啲私人投資者加入，喺下月之前先籌到1,200萬美元，再喺明年底前籌到1,000萬美元，啲錢會先用喺香港及新加坡開嘅6間餐廳，之後再喺5年內將業務進一步延伸到日本、菲律賓、印尼、韓國及馬來西亞等亞洲國家。至於佢哋第一間喺香港開嘅餐廳最快喺明年第二季開業，近期就會去搵舖位。
34歲嘅Jamie細細個就有閱讀障礙症，16歲就無再讀書，但條條大路通羅馬，上天係唔會待薄勤力嘅人，九九年佢開始成為著名電視烹飪節目主持人，更獲英女王頒發大不列顛帝國員佐勳章（MBE）。
余絲韻