依家金融機構除咗要生意好，仲好講究企業社會責任，法國興業銀行尋晚舉行咗一場名為《SG Got Real Talents Concert》嘅Show，聽個名以為係似英國、美國好流行嘅天才表演電視節目，其實係慈善Show至真。法興今次係首次發動全港逾百名員工及佢哋嘅家人作表演，為安徒生會籌款，推動本港基層兒童服務發展。
為安徒生會籌款表演
整個慈善表演嘅節目統籌、聯絡、表演以至門票銷售，全部由法興員工一手包辦，尋晚所有員工傾巢而出大Show才技，唱歌、跳舞、樂器表演等樣樣齊，其中由企業及投資銀行業務亞太區人事部主管Joyce Yap統領嘅Bollywood印度舞，更掀起整晚高潮。去到晚會尾聲，企業及投資銀行業務亞太區行政總裁段陳第更聯同所有員工及小朋友大合唱《We are the World》，呼應活動主題。
李錦任企業社責大使
絲絲尋晚在場所見反應好好，全場四百幾個位座無虛席。其實法興已與安徒生會合作咗兩年，之前曾合辦「悅讀小良伴」計劃，派出同事義工隊伍為中小學生配對閱讀夥伴。
法興上上下下都好熱衷參與服務社會嘅活動，唔講唔知，原來經常出嚟講窩輪投資嘅法興證券股票衍生工具（亞洲──日本除外）董事李錦，係該公司香港區嘅企業社會責任大使。
余絲韻