本文重點
密謀明年上市嘅美國友邦保險（AIA），其香港及澳門首席執行官陳榮聲直言喺上任後，首要就係推多啲「爆炸性」嘅產品，Jacky（陳榮聲洋名）話AIA依家已經一季做得好過一季，估計好快就會搶番失落嘅位置。
以前AIA喺香港保險業界一向都係一哥，不過金融海嘯捲低咗母公司AIG，AIA都搞到要分拆上市，但係睇嚟Jacky無驚過，仲話要推出「爆炸性」產品。
陳榮聲話盤數靚咗
究竟係乜嘢產品咁轟動？Jacky話要賣關子，唔通推啲勁着數嘅產品吸引人，順便谷靚盤數等上市？佢就擰擰頭，仲話條數依家已經靚咗。
近期啲新股成績好一般，唔知會唔會阻礙AIA上市大計呢？Jacky同絲絲講，話一定會搵個適當時機上市。咁依家班AIA嘅客仔或者員工，又有無得獲贈AIA股份或者有折扣呢？Jacky笑笑口安撫大家，話了解各界期望，依家正在研究中。大家真係要拭目以待，睇吓AIA未來有乜嘢新公布喇！
余絲韻