本文重點
早排股壇前輩高振順辭任中國風電（00182）主席，由內地風電專家劉順興接任，絲絲就聽到有股民擔心佢會退出中國風電，不過尋日公司就出咗個委任通告，原來高生嘅千金高穎欣（洋名Samantha）做執董，實行幫老竇睇實盤生意咁話喎。
睇番風電個通告，Samantha份履歷非常漂亮，年僅30歲就已經喺金融界打拚咗7年。
年紀輕輕履歷夠照
Samantha唔單止喺Mount Holyoke College經濟及數學學士畢業，仲係英國倫敦帝國管理學院（Imperial College Management School）金融系碩士，倫敦帝國大學係名牌大學，拎咗諾貝爾物理學獎得主高錕都係佢嘅校友！
Samantha畢業後入咗兩大投行大摩及摩通做「賓卡」，加入風電前係滙豐結構性信貸及基金解決方案團隊董事。老友話Samantha係有料之人，依家每月7萬元嘅董事酬金同佢喺投行嘅人工根本無得比，今次喺滙豐辭職過嚟幫老竇手，有孝心之餘仲仍然單身，各位城中才俊要留意啦！
余絲韻