本文重點
財金界近排有唔少人退休，絲絲尋日八到，滙豐金融證券（亞洲）嘅CEO關百忠亦決定退休，結束佢喺滙證27年嘅證券界生涯。
効力滙證達27年
絲絲聽聞愛德華（關之洋名）十一月三十日就會Last day，然後放個大假，跟住就正式離開滙證，至於呢位滙證老臣子之後會有乜去向？
絲絲收到風話佢暫時仲未有決定，反正都拚搏咗咁多年，又唔愁無飯開，不如去旅行放吓假，到時先再諗吓有乜想做都唔遲。
講開又講，愛德華絕對係紅褲子出身，皆因佢同好多股壇前輩一樣，當年都喺「少林寺」新鴻基證券出身，愛德華喺八二年跟司徒振中過檔獲多利（滙證前身），結果佢一做就做咗27年，認真長情及忠心。
除咗滙證，愛德華喺證券界都出任好多公職，好似喺香港證券專業學會、證監會程序覆檢委員會、港交所嘅衍生工具市場諮詢小組等組織都擔當唔同職位。
余絲韻