本文重點
不論對客戶或員工，銀行都好講求歸屬感，港人對獅子錢莊嘅歸屬感就不在話下，絲絲單睇佢哋嘅存款基礎，以及之前散戶血肉長城頂住滙控股價，就知幾咁厲害；不過今年連員工嘅「歸屬感」指數都再「升呢」，可能與股價大反彈有啲關係。
港員工投入度大增
話說滙豐今年六月及七月做咗一個員工意見調查，香港員工投入度升到71%，按年升12個百分點；亞太區員工投入度亦按年升兩個百分點，同樣升至71%。
絲絲記得三月滙控公布業績及供股計劃後，股價曾跌到七個一皮嘅33蚊，不久後滙控就推出咗新一輪嘅「員工股份儲蓄計劃」，員工可以結束之前嘅計劃，取回本金後再重新加入計劃，以超低價儲滙控股份。
當時英鎊低企，仲要用邀請日之前嘅平均收市價42.85元計，八折後每個員工可以唔使35蚊儲滙控股票，依家回頭望番真係賺到笑。今年六月及七月做員工意見調查時，參加儲蓄計劃嘅員工已賺咗一倍，如果以依家計更加唔止添，咁你估十月再做多次員工意見調查，會唔會再高分啲？
余絲韻