本文重點
今個月除咗多喜慶節日外，可能亦係履新嘅好日子，好似港交所（00388）候任行政總裁李小加就會喺月中（下星期五）履新，不過大家唔好諗住好似「攞命陳」（金管局總裁陳德霖嘅洋名諧音）咁，可以喺佢返工首日問佢任內有乜嘢抱負及目標，因為據聞李小加正式返工嘅首日已出咗門公幹，唔喺香港。
與周文耀外訪忙打招呼
絲絲聽聞，李小加月中會同現任行政總裁周文耀到美國進行拜訪活動，但詳情就唔多清楚，所以大家如果想問佢返工嘅感受及目標，就要等佢返嚟先得。
周文耀早前已經開咗「期票」，話會喺未來3個月嘅過渡期內與李小加一齊外訪，介紹佢畀各監管機構及相關團體嘅人認識，因此李小加未來肯定要四圍飛。
事實上，佢喺十二月亦會與周文耀去台灣出席兩岸三地嘅研討會。
港交所下月日韓搞推介
講開外訪，港交所喺下月九日及十日會首次同時喺南韓及日本舉行研討會推介香港，今次港交所係夥拍貿易發展局等，向南韓及日本嘅公司推介如何利用香港途徑，進軍內地以及籌集資金，仲暫定會邀請財經事務及庫務局局長陳家強出席添。
余絲韻