前晚美股跌逾兩百點，粉飾櫥窗嘅無形之手玩失蹤外，開市前公布的ISM製造業指數，都係令好友們鳥獸散嘅主因，八月份數據由52.9回番落去九月的52.6，比市場估計的54為差。儘管企於50樓上已表示製造業在擴張中，但力度唔及預期，令賭美國經濟第三季尾、第四季初強力反彈嘅相當失望，其中美債孳息反應至大，兩年美債由0.95厘回番到0.87厘水平，三年亦由1.42厘回落到1.33厘，利率期貨顯示明年上半年美國加息的機會稍稍回落。

恒指需重返50日線

整個星期計，恒指一周跌649點，昨日跌市成交不跌反升，達569億元，唔係好兆頭，可見沽壓都幾重。恒指堅守多時嘅50日線20,648點終於頂唔住，假如下周初唔能夠盡快收復，一旦確認破位，恐怕下一站要到20,000點甚至上次回吐低位19,500點。

經過大半年升市，現時要搵估值仲係吸引嘅股票真係唔易，當中又以工業股最啱筆者口味，皆因歐美出口逐漸恢復過來外，原材料價格回落，幫助同樣唔細。

剛回歸台股以TDR掛牌的巨騰國際（03336），筆者鍾意佢原因就係貪佢夠簡單，業務獨沽一味，主攻手提電腦機殼。巨騰優勝之處在於肯花錢在科研及固定投資，近年手提電腦外殼，由過往塑膠「升呢」到鎂合金，美觀之外亦夠堅固。

受惠硬件更新周期

基於生產設備再唔係傳統的注塑機，閒閒地要數以億元，唔係太多中小廠可以負擔，肯花錢的巨騰，定單也愈做愈大，市佔率由○五年上市時兩成許，到今日高踞三成穩執行業牛耳，客戶包括戴爾、新力、東芝、惠普及蘋果電腦等電腦巨頭。

近季環球電腦付運有見底迹象，德銀PC團隊剛應經濟見底及微軟「視窗七」系統推出，激發硬件更新周期，調高一○至一二年電腦付運增長預期，估計有10%、12%及12%增長，令人憧憬係麻麻地嘅○八及○九年都做得唔錯嘅巨騰，未來三年一旦變番好景，會幾受惠。更重要係市盈率唔夠十倍，以未來增長前景，都算吸引。

戴峰修