近排天災特別多，先有超級颱風凱薩娜先後吹襲菲律賓、越南及柬埔寨，跟住印尼又接連發生大地震，啱啱宣布將行政總裁辦公室搬嚟香港，大力發展亞洲新興市場嘅滙豐就好識做，即時捐30萬美元畀紅十字會搞亞洲賑災。
受到金融海嘯影響，滙豐自己都要集資自救，不過眼見多國受天災影響，滙豐亦義不容辭捐錢賑災，記得去年大陸「五‧一二」地震嗰陣，滙豐都即時捐出1,000萬人仔。
滙豐管理層成日強調世界嘅重心會由西轉向東，佢哋喺亞洲有咁多業務，仲頂起咗成個集團喺美國嘅虧損，出現天災人禍當然要捐番啲錢盡吓企業責任。記得去年滙豐用幾億美元買咗印尼Bank Ekonomi，將當地分行網絡擴大至190多個網點。
正如滙豐亞太區行政總裁霍嘉治所講，佢哋知道人命傷亡難以彌補，但希望捐款可為救災提供一啲支援。絲絲知道，滙豐仲設立咗專戶收集亞太區職員嘅捐款。
余絲韻