美股隔晚受企業購併消息刺激，道指升逾百點，帶動環球股市回升。港股借勢在期指結算日挾淡倉，可惜成交薄弱，上升動力好有限。恒指係就係重上21,000點，但又唔見得詩詩班炒鬼老友拍手叫好，事關二三線股走晒樣。詩詩所持國美（00493）升番1%，未有耐見家鄉。不過唔少大行都睇好其前景，詩詩一於坐定定。
廣南集團（01203）已公布中期純利，馬口鐵業務溢利平穩，亦繼續派息，尋日股價急升逾一成，唔排除在低息環境中，有投資者出動搶息。由於馬口鐵多用作飲料罐、食品罐、瓶蓋等與食品相關的容器，既為副食品製品，罐頭及飲料的必需品，有一定市場需求。
經過去年底市場去庫存化逐步完成，廣南的馬口鐵銷售量，亦已回復至正常水平，相信集團全年業績表現平穩。近日大市走勢欠明朗，唔少投資者未敢貿然入市，而廣南派息穩定，現價市帳率不足1倍，市盈率10倍左右唔算高，在風雨飄搖的市況中，自有其獨特吸引力。
詩詩