本文重點
派完全年業績表冇耐嘅新地（00016）又出成績表，絲絲講緊係權威資本市場刊物《Asiamoney》（亞洲貨幣）舉辦嘅「最佳企業管治五年總選」之結果。新地喺過五關斬六將嘅情況下，終勇奪「2004至2008年最佳企業管治公司」榮銜，呢個咁高難度嘅殊榮係代表新地喺過去五年都蟬聯「最佳企業管治公司」，仲要喺數年間一點一滴累積得分贏返嚟嘅。
根據四大指標評分
《Asiamoney》嘅評分標準唔係純粹睇公司業績咁簡單，而係以大部分投資者都好重視嘅資料披露與透明度、股東權益及公平待遇、管理層及董事局承擔，以及與投資者之間關係為四大指標。喺全球金融海嘯嘅投資困境中，亞洲及香港嘅各大企業都力保企業管治水平，難得新地仍可高踞業內領導地位，唔怪得新地執行董事兼首席財務總監陳國威代表公司領獎時都不禁指出，集團將貫徹企業方針，竭力保持呢個地位。
余絲韻