本文重點
由大摩持有34%股權嘅投行中金（CICC），近年做咗好幾單大刁，嚟緊仲會陸續有來，咁嘅形勢真係要班齊腳至得。中金最近聘請咗前花旗集團全球股票策略師Hao Hong擔任全球股票策略師，身在紐約嘅Hao話，會幫助機構客戶決定如何投資中國市場，同時協助中金研究領域覆蓋至全球市場。
擬搬紐約 引資投華
今次中金羅致Hao Hong正好配合其全球策略部署，事實上，佢哋宣布計劃今年內喺紐約營運，方便服務客戶，公司已喺紐約租寫字樓，又計劃未來5年招請30人銷售中國證券。
除花旗外，Hao Hong之前亦曾擔任Brean Murray Carret & Co.中國研究董事總經理，而喺○五至○七年於花旗任職期間，曾與總策略師賀嘉博（Ajay Kapur）共事。Hao Hong取得澳洲管理學院商管碩士學位，同時擁有特許財務分析師（CFA）資格，佢喺加盟中金後會長駐北京。
中金現由中國前總理朱鎔基之子朱雲來擔大旗，今年七月曾安排中國建築上市，集資額達502億元人民幣，係全球過去16個月最大宗公開招股上市。
余絲韻