本文重點
潮流興增值，就算做「賓卡」都要周身刀張張利，好似Citibank環球個人銀行服務信用卡業務總監郭偉略（Neil）咁，為咗宣傳信用卡，就扮萬世偶像「貓王」皮禮士利，絲絲見到佢嘅「唱片封套」，都忍唔住讚佢夠出力！
宣傳八達通信用卡
英國人一向相當幽默，喺英國出世嘅Neil自然有番咁上下搞笑本色。○七年底開始負責花旗信用卡嘅佢，一向相當玩得，不時同成班同事打成一片，今次花旗信用卡又有新宣傳優惠，Neil亦粉墨登場扮鬼扮馬，將自己個樣Key落明星「貓王」嘅唱片封套，等絲絲一睇仲以為佢出咗碟！
今次花旗主要宣傳佢哋張碌得又嘟得嘅八達通信用卡，玩家自己創作一首獨有嘅音樂配合廣告，搞埋混音，再揀個心水嘅唱片封面Key自己個頭落去，只要喺網上有愈多粉絲鍾意你隻碟，就有機會獲1,000蚊八達通現金獎賞。最搞笑係，混音嗰時仲要加埋嘟八達通嘅聲同埋碌卡聲，認真有諗頭！
余絲韻