本文重點
金管局總裁任志剛今日就Last Day，尋晚一班金管局同事專登喺馬會同佢搞番個歡送會，為任總十幾年嘅金管局生涯畫上句號，總共有成二百幾位同事出席，明日就正式接任總裁嘅陳德霖都有出席，仲同任總進行咗「交棒儀式」，寓意未來肩負維持香港金融穩定嘅工作就由陳德霖揹起喇。
同事送贈心意禮物
呢個交棒儀式係名副其實嘅交棒，因為係一支田徑場上嘅接力棒。任總面對咁多並肩作戰多年嘅伙記，真係千言萬語，唔知講乜好，惟有憑歌寄意，邊唱邊誦《My Way》呢首名曲。台下個個都聽得好入神，特別係任總嘅老婆同埋仔女，罕有出席金管局宴會嘅佢哋，默默咁望住任總唱歌。
金管局嘅同事唔單止以張學友嘅名曲《祝福》回敬，仲整咗幾份好有心意嘅禮物畀任總留念。第一份係Q版行山公仔（因為任總閒時最愛行山）；第二份係用超過600塊Puzzle砌成嘅畫，最特別幅畫係由600位員工嘅證件相拼合而成；第三份係一本紀念冊，係由金管局同事寫下嘅心意卡組成。
任總一手帶大金管局，班同事整咗隻光碟喺歡送會中播出，等大家可以緬懷一下歷史，咁有歷史意義嘅光碟，任總都有保留番一隻。喺大家依依不捨之時，任總最後以一曲《Auld Lang Syne》送畀所有同佢合作過嘅同事。
余絲韻